Komiteti për Pakicat Kombëtare në mbështetje të ligjit Nr. 96/2017“Për mbrojtjen e pakicave kombëtare në Republikën e Shqipërisë”, VKM Nr. 726, datë 12.12.2018 “Mbi organizimin dhe funksionimin e Komitetit të Pakicave Kombëtare”, VKMsë Nr.769 datë 15.12.2021 për “Kriteret e mbështetjes së nismave dhe projekteve që synojnë mbrojtjen e të drejtave të pakicave kombëtare, dhe kriteret e përzgjedhjes për financimin dhe administrimin e fondit për pakicat kombëtare”, të politikave të tij si dhe programit vjetor 2024 “Për pjesëmarrje në procedurë konkurrimi për financim me grante”, shpall thirrjen nën moton:
“Diversiteti: arti i të menduarit të pavarur së bashku.”
Kjo thirrje e Komitetit të Pakicave Kombëtare synon të mbështesë financiarisht me fonde publike projekt-propozime të paraqitura nga organizatat e shoqërisë civile,(të cilat janë të regjistruara sipas ligjit, ushtrojnë veprimtari sipas objektit të përcaktuar në statutin e tyre dhe disponojnë NIPT); si dhe individë, persona fizikë të regjistruar në QKB; që kanë në objektin e ushtrimit të aktivitetit mbrojtjen, promovimin mbështetjen e të drejtave të pakicave kombëtare (pra i përkasin një pakice kombëtare).
Kjo thirrje synon mbështetjen e projekteve që zhvillohen në Shqipëri.
Thirrja për projekt-propozime e Komitetit të Pakicave Kombëtare për vitin 2024 do të qëndrojë e hapur nga data 20 shkurt 2024 deri në datën 5 prill 2024 ora 14.00. Projekt-propozimet e paraqitura duhet të realizohen deri në muajin dhjetor të vitit 2024 dhe duhet t’i përmbahen kritereve të shpallura në Udhëzuesin e Granteve.
Theksojmë se Komiteti për Pakicat Kombëtare në rolin e autoritetit financues mbështetet në parimet e mëposhtme:
- Lirinë e pjesëmarrjes e të konkurimit;
- Mosdiskriminimin e trajtimin e barabartë;
- Transparencën e procedurave dhe të vendimmarrjes, duke u ofruar të gjithë kandidatëve të dhënat e procedurës përkatëse;
- Përputhshmërinë me objektivat e grantit e me efektivitetin e përdorimit të burimeve, në bazë të sistemit të konkurrimit dhe të kritereve, që mundësojnë vlerësimin e projektpropozimit dhe të specifikimeve teknike e financiare për përzgjedhjen e shpërndarjen e grantit;
- Mungesën e prapaveprimit, duke përjashtuar mundësinë e shpërndarjes së fondeve për veprimtari tashmë të realizuara në datën e vendimmarrjes;
- Paanshmërinë e shqyrtimit e të vendimmarrjes dhe parandalimin e konfliktit të interesave;
- Përjashtimin e mbivendosjes, që nënkupton shmangien e financimit të së njëjtës veprimtari për të njëjtin interes konkret, më shumë se një herë, gjatë një viti fiskal.
Projekt propozimet duhet të dorëzohen në zyrën e protokollit të Komitetit për Pakicat Kombëtare brenda datës së caktuar më sipër.
Komisioni i vlerësimit të projekt- propozimeve, krijohet me urdhër të Kryetarit të Komitetit për Pakicat Kombëtare. Vlerësimi mbështetet në përputhjen e projekt-propozimit të paraqitur nga kandidati aplikues në procedurat e konkurrimit për financime me grante me qëllimin e organizatës/kandidatit dhe programin që zbaton, në kapacitetet e kandidatit, në efektshmërinë e aktiviteteve, në pritshmërinë dhe koston e tyre.
Afati për vlerësimin e projekt propozimeve dhe shpalljen e rezultateve është jo më shumë se 30 (tridhjetë) ditë kalendarike nga afati i përcaktuar në dokumentet e konkurrimit për dorëzimin e projekt-propozimeve. Kandidatët do të njoftohen brenda 15 (pesëmbëdhjetë) ditëve kalendarike nga data e përfundimit të vlerësimit të rezultateve të konkurrimit.
Çdo njoftim dhe komunikim do të bëhet përmes faqes zyrtare të Komitetit të Pakicave Kombëtare www.pakicatkombetare.gov.al si dhe ne adresë elektronike: info@pakicatkombetare.gov.al
Lista e dokumentave për aplikim:
Aneksi 1 Udhezuesi i Granteve 2024
Aneksi 2 Formulari i Aplikimit 2024
Aneks 3 Tabela per kostot financiare te projektit 2024
Aneks 4 Tabela e aktiviteteve 2024
Aneks 5 Lista e dokumenteve 2024
Aneksi 6 Vleresimi dhe kriteret ne perzgjedhjen e kandidateve 2024